Total Pageviews

Saturday, November 16, 2019

பணம் !

கருவறையில் இருந்து கல்லறை வரை சில்லறை தேவை’ என்று சொல்லி கேட்டிருப்போம். இது ஒருவிதத்தில் உண்மைதான். சாப்பாடு, துணிமணி, வீடு என்று எல்லாவற்றுக்கும் பணம் தேவை.


 ஒரு வணிக பத்திரிகையின் ஆசிரியர் சொல்கிறார்: “பணம்தான் சமுதாயத்துக்கு ரொம்ப முக்கியம் . . . 

ஒருவேளை பணத்தை வைத்து எந்த பொருளையும் வாங்கவோ விற்கவோ முடியாது என்ற நிலை வந்துவிட்டால், எல்லாரும் குழம்பி போய் விடுவார்கள். ஒரே மாதத்தில் போரே வெடிக்கும்.”

இருந்தாலும், பணத்தால் எல்லாவற்றையும் வாங்க முடியாது.

பணத்தை வைத்துக்கொண்டு, சாப்பாட்டை வாங்கலாம் பசியை வாங்க முடியாது.

மருந்தை வாங்கலாம் ஆரோக்கியத்தை வாங்க முடியாது.

மெத்தையை வாங்கலாம் தூக்கத்தை வாங்க முடியாது.

புத்தகத்தை வாங்கலாம் புத்தியை வாங்க முடியாது.

நகையை வாங்கலாம் அழகை வாங்க முடியாது.

 ஆடம்பரத்தை வாங்கலாம் அன்பை வாங்க முடியாது.

 கூட்டத்தை வாங்கலாம் நண்பர்களை வாங்க முடியாது.

வேலைக்காரர்களை வாங்கலாம் விசுவாசத்தை வாங்க முடியாது .


வாழ்வதற்கு பணம் தேவைதான், ஆனால் பணமே வாழ்க்கையாகிவிடக் கூடாது. 

இந்த உண்மையை உணரும் ஒருவர் திருப்தியாகவும் சந்தோஷமாகவும் வாழ்வார்.

 “பண ஆசை எல்லா விதமான தீமைக்கும் வேராக இருக்கிறது; சிலர் இந்த ஆசையை வளர்த்துக் கொண்டு . . . பலவித வேதனைகளால் தங்களையே ஊடுருவக் குத்திக்கொண்டிருக்கிறார்கள்”

பணம் வைத்திருப்பது தப்பில்லை ஆனால், பணத்தின் மீது ஆசை வைத்திருப்பதுதான் தப்பு.

பணத்துக்கு அதிக முக்கியத்துவம் கொடுக்கும் போதுதான் உறவுகளுக்கு இடையே விரிசல்கள் ஏற்படுகிறது!

வாழத் தெரிந்த மனிதர்கள் !

பெரும்பாலான மனிதர்கள் கனவு உலகிலேயே  வாழ்கின்றனர். 


விழித்துப் பார்த்தால் தான் உண்மையான வாழ்க்கை புரியும்.

சந்தோஷத்தை  நிராகரிப்பவர்கள் எவரும்  இல்லை. 

அதே சமயம் துக்கத்தை ஏற்பவர்களும் எவரும் இல்லை. 

கர்மம் என்பது பந்தப் படுத்துவதும், பந்தத்திலிருந்து விடுவிப்பதும் ஆகும்.

 கர்மத்தை விடாமல் ஞானத்தை பெற முடியாது.

அர்ப் பணிப்புகள் இருந்தால்தான் உயர்ந்த பலனைப் பெற முடியும்.


குறிப்பாக அகங்காரங்களை அர்ப் பணிக்க வேண்டும். ஒவ்வொருவரும் சுய நலத்தை விடுத்து கொஞ்சம், கொஞ்சம் பொது நலத்தில் ஈடுபட வேண்டும்.

எதுவெல்லாம் அழியக்கூடியதோ அதைப் பற்றி கவலைப்படக் கூடாது. 

உடலைப் பற்றி கவலைப்படாதவர்கள் வாழத் தெரிந்தவர்கள் ! மற்றவர்கள் வாழத் தெரியாதவர்கள்! வாழ்வை விரையம் செய்கின்றனர் என்று அர்த்தம்!

Thursday, November 14, 2019

தீக்காயங்கள் அடிக்கடி கேட்கப்படும் கேள்விகள் !


  தீக்காயங்கள்

        காயங்கள் ஏற்படும் முறை

        முக்கியமாகச் செய்யக்கூடாதவைகள்

        பொதுவான சிகிச்சை

        பராமரிப்பு

        சிறப்பு சிகிச்சை தேவைப்படும் தருணங்கள்

        அடிக்கடி கேட்கப்படும் கேள்விகள்

தீப்புண்கள் மற்றும் வெப்ப காயங்கள் முதலியவை சருமத்தில் தழும்புகள், உடல் பகுதிகளில் உருமாற்றம்,மனச்சோர்வு மற்றும் தாழ்வு மனப்பான்மை போன்ற பாதிப்புகளை விளைவிக்கும். இப்படிப்பட்ட விளைவுகள் நீண்டநாட்கள் கழித்து மறையலாம்.சில சமயங்களில் நிரந்தரமானவைகளாக இருக்கும். எனவே தீவிர பாதிப்புகளுக்கு உட்பட்ட புண்களுக்கு சரியான, ஜாக்கிரதையான மற்றும் தகுந்த சிகிச்சை அவசியம். உடலானது சுட்டெரிக்கும் அனல் மற்றும் சக்திவாய்ந்த வேதிப்பொருட்களுடன் படும்போது / மிக நெருக்கமாக தொடர்புகொள்ளும்போது புண்கள் ஏற்படுகின்றன. கீழ்க்கண்ட நிகழ்வுகள் மூலம் இவை பெரும்பாலும் நடக்கின்றன.
காயங்கள் ஏற்படும் முறை

பாத்திரங்களை சூடுபடுத்தும் போது,

    கடாய் மற்றும் பாத்திரங்களின் கைப்பிடிகள்,அடுப்பு,சமையல் பாத்திரங்கள் போன்ற சமையலறை சாமான்கள் பராமரிப்பின் போது...
    தண்ணீர் கொதிக்கவைக்கும் பாத்திரங்கள்,கருவிகள்,ஹீட்டர்,துணி தேய்க்கும் அயர்ன்பாக்ஸ் உள்ளிட்ட நவீன மின்சாதனங்கள் பயன்படுத்தும் போது.

    திறந்த வெளியில் சமைக்கும் பொழுதும், எரிவாயுக்கள் மற்றும் மின்சாரம் போன்றவற்றாலும் எதிர்பாராமல் நிகழும் தீ விபத்துகள்.

    ஆடைகள் மற்றும் பிற பொருட்கள் தற்செயலாக தீப்பற்றிக்கொள்ளுதல்
    வெளுப்பான்கள் மற்றும் வீரியம் மிக்க கிரிமிநாசினிகள் உபயோகப்படுத்தும் போது
    சுட்டெரிக்கும் சூரிய வெப்பம் மற்றும் அனல் காற்றின் போது,
    கயிறைக் கைகளால் பற்றிக்கொண்டு அதி வேகத்தில் இறங்கும் பொழுது ஏற்படும் வெப்பத்தால் உருவாகும் காயங்கள்.

    மேலும், பெரும்பாலான தீப்புண்கள் வீடுகளில் ஏற்படுகின்றன. எனவே வீடுகளிலேயே சிகிச்சை அளிக்கப்படலாம். பெரும்பாலான வீடுகளில் நடக்கும் விபத்துக்கள் சமயலறையில்தான் ஏற்படுகின்றன. எனவே, இங்கு பாதுகாப்புடன் இருக்க வேண்டும்.

    விபத்துக்குள்ளானவர்களுக்கு சிகிச்சை அளிக்க சமையலறையே சிறந்த இடமாகும். இனிமேல் எவ்வித அசம்பாவிதங்களும் ஏற்படாமல் இருக்கும்வண்ணம், பாதுகாப்பின் முக்கியத்துவத்தை நாம் வலியுறுத்த வேண்டும். வயதானவர்கள், ஊனமுற்றவர்கள், குழந்தைகள் (குறிப்பாக தளர்நடை குழந்தைகள்) ஆகியோர்தான் அதிகளவில் பாதிப்புகளுக்கு உள்ளாகின்றனர். வயதானவர்கள் மற்றும் சிறுவர்களுக்கு ஏற்படும் அனைத்து தீப்புண்களையும் அலட்சியம் செய்யாமல் அதிக கவனம் கொண்டு சிகிச்சை அளிக்க வேண்டும்.

முக்கியமாகச் செய்யக்கூடாதவைகள்

காயம் ஏற்பட்டதும் உடலில் எந்த விதமான தீப்புண்கள் ஏற்பட்டுள்ளது? நீங்கள் என்ன உதவிகள் செய்யலாம்? என்பதனை அறியும் முன் நீங்கள் கண்டிப்பாக செய்யக்கூடாத சில காரியங்களும் உண்டு. அவை பின்வருமாறு:

    ஒருபோதும் தீப்புண்களின் மீது வெண்ணெய், மாவுகள் அல்லது சமையல் சோடா முதலியவற்றைப் போடாதீர்கள்

    ஒருபோதும் ஆயின்மென்ட், லோஷன் மற்றும் எண்ணெய்களை சிகிச்சையளிக்கப் பயன்படுத்தாதீர்கள்.

    ஒருபோதும் புண் மற்றும் கொப்புளங்களைக் கிழிக்கவோ, கிள்ளவோ அல்லது உடைக்கவோ செய்யாதீர்கள்

    தேவையின்றி தீப்புண்களைத் தொடவோ அல்லது கையாளவோ செய்யாதீர்

    தீக்காயத்தில் ஒட்டியுள்ள துணிகளை ஒருபோதும் அகற்ற முயற்சிக்காதீர்.

    தீக்காயங்களுக்கு மருத்துவரின்றி சிகிச்சை அளிக்காதீர்.

இன்றைய நாட்களில் மக்கள் உடுத்தும் பெரும்பாலான ஆடைகள் சிந்தடிக் பொருட்களால் ஆனவை. அவை தீயினால் உருகி மிட்டாய்கள் போன்று சருமத்துடன் ஒட்டிக்கொள்ளும். இதுபோன்று ஒட்டிக்கொண்ட துணிகளை அகற்ற முயற்சிப்பீர்கள் என்றால் அது தேவையில்லாமல் சருமத்தில் வலியையும் புண்ணின் பாதிப்பையும் அதிகரிக்கும். 

அப்படிப்பட்ட துணிகளை கிருமித்தொற்று இல்லாமல் முறையாக அகற்ற மருத்துவர் மூலமே சிகிச்சை அளிக்க வேண்டும்.எனவே அத்துணியினை அப்படியே விட்டுவிடுவது நல்லது.

பொதுவான சிகிச்சை

சில குறிப்பிட்ட வகை தீக்காயங்களைத் தவிர்த்து மற்ற அனைத்து தீக்காயங்களுக்கும் பொதுவான சிகிச்சை முறைகள் உண்டு.மிகச் சிறிய காயங்களைத் தவிர, இதர காயங்கள் ஆபத்தானவை, அதிக வலியுள்ளவை மற்றும் உளைச்சலை ஏற்படுத்தும். வீடுகளில் ஏற்படும் தீ விபத்து,சாலைகளில் பெட்ரோலியப் பொருட்களால் உருவாகும் தீ விபத்து போன்றவை பெரும்பாலான சமயங்களில் நிகழக்கூடியவை.இவைகளின் அவசர நிலை மற்றும் முக்கியத்துவத்தை உணர்ந்து செயல்பட வேண்டும்.உதவி செய்வதற்கான முதற்கட்ட செயல்பாடுகள் அதிக முக்கியத்துவம் 

வாய்ந்தவை.விபத்துக்குள்ளானவரை அமைதிப்படுத்தி, ஆறுதல் படுத்தி தேற்ற வேண்டும் என்பதை அவசியம் ஞாபகத்தில் வைக்கவும். 
அவர்களிடம் கனிவாக இருங்கள்.அதே சமயம் அவரை மருத்துவமனை கொண்டு செல்ல விரைவாக செயல்படுங்கள்.செய்ய வேண்டியவகளை முறையாகவும் வரிசைப்படியும் செய்யுங்கள்.

சருமம் மற்றும் அதில் உள்ள திசுக்களில் தீக்காயம் ஏற்பட்டதும் அவற்றிலிருந்து அதிகளவு ரத்தம் மற்றும் ஒரு வகையான திரவம் வெளியேறும். பாதிக்கப்பட்ட பகுதியில் உள்ள திசுக்கள் அதிக வெப்பத்தினைத் வெகு நேரம் தாங்கிக்கொள்ளக்கூடியவை.இது அதிக வலி மற்றும் பாதிப்புக்கு வழிவகுக்கும். வெப்பத்தை முடிந்த அளவு போக்கவேண்டும் என்பதே முதற்கட்ட சிகிச்சையின் முக்கிய குறிக்கோளாக இருக்க வேண்டும். முதலுதவி சிகிச்சை மூலம் அவசியம் சிதைவுற்ற திசுக்களில் உள்ள வெப்பத்தினைக் குறைக்க வேண்டும்.

    பக்கெட் அல்லது சமயலறை தண்ணீர் தொட்டி/சிங்கில் குளிர்ந்த நீரை நிரப்பி அதில் காயப்பட்ட பகுதியை அமிழ்ந்திருக்கும் வண்ணம் செய்யுங்கள்.அதிக வேகமாக இல்லாமல் மிதமான வேகத்தில் குளிர்ந்த தண்ணீர் வரும் குழாயின் கீழ் தீக்காயமடைந்த பகுதியைக் காட்டி தண்ணீர் படும்படியும் செய்யலாம்.
    தீப்புண்ணை சுமார் 15 நிமிடங்கள் குளிர்ந்த நீரில் அமிழ்ந்த வண்ணம் அவசியம் வைக்கவேண்டும். அப்படி வைப்பது சிரமமாக( முகத்தில் உள்ள தீக்காயம் போன்றவற்றுக்கு )இருந்தால், ஏதாவது மென்மையான மற்றும் தூய்மையான துணியைக் குளிர்ந்த தண்ணீரில் நனைத்து அந்த காயத்தின் மீது வைக்கவுமஇவ்வாறு அடிக்கடி மீண்டும் குளிர்ந்த தண்ணீரில் நனைத்து மாற்றி மாற்றி போடவும். ஆனால் தீக்காயத்தைத் துணியைக் கொண்டு தேய்க்காதீர்கள். இந்த சிகிச்சைகள் தீக்காயமடைந்த திசுவிலுள்ள வெப்பத்தினை ஓரளவுக்கு வெளியேற்றவும் மற்றும் மென்மேலும் ஏற்படும் சிதைவு, சிவத்தல், கொப்புளம் வருதல்,வலியின் அளவு மற்றும் தன்மையைக் குறைக்கவும் தடுக்கவும் உதவும்.

    காயம் ஏற்பட்டவுடன் மோதிரம், வளையல், ஷூ மற்றும் அணிந்துள்ள அனைத்து ஆபரணங்களையும் சீக்கிரமாக நீக்க வேண்டும். ஏனெனில் காயத்தின் காரணமாக வீக்கம் ஏற்படலாம். அப்படி வீக்கம் ஏற்பட்டால் மேற்கூறிய பொருட்களை நீக்குவது பின்னர் கடினமாகிவிடும்.

    சிறிய மேலான தீக்காயங்களாக இருந்தால் வலிநீங்கியவுடன் ஜாக்கிரதையாக புண்ணை உலரச் செய்யவும். பின்னர் அதை சுத்தம் செய்து பக்குவமாக கட்டு (ட்ரஸ்ஸிங்) போடவும். பெரிய காயங்கள் அல்லது ஆழ்ந்த தீக்காயங்களை குளிர்ந்த தண்ணீரிலிருந்து எடுத்தவுடன் அவசியம் அவற்றை சுத்தமான,கந்தல் இல்லாத மற்றும் பஞ்சு ஒட்டாத துணியை வைத்து இலகுவாக மூடவேண்டும் ( கை,கால்களை மூட சுத்தமான பைகள், நீளமான காலுறைகள் பொருத்தமானவை)
    மருத்துவரை அழைக்க ஆள் அனுப்புங்கள் அல்லது ஆம்புலன்ஸை அழையுங்கள்
    தபால் தலை அளவைவிடப் ( 2 x 2 1/2 செ மீ ) பெரியதாக உள்ள எந்த தீப்புண்ணும் அவசியம் ஒரு மருத்துவரால் சிகிச்சை அளிக்கப்பட வேண்டும். நீங்கள் குளிர்ச்சி வைத்தியம் கொடுத்தவுடன் மருத்துவரை அழைக்க வேண்டும்.

    பெரிய அளவில் பலத்த காயம் இருப்பின் மருத்துவமனை பராமரிப்பு தேவை.அப்படி அவரை மருத்துவமனைக்குக் கொண்டு செல்லும் போது, ஐஸ் கட்டிகளை டவல்களில் வைத்துக்கட்டி அதைக் காயத்தின் மேல் வைத்துக் கொண்டே செல்ல வேண்டும்.

    தீக்காயமடைந்த பகுதியை நோய்த்தொற்று ஏற்படாமல் மூடிவைப்பது அவசியம். அப்படி செய்வது விபத்துக்குள்ளானவர் காயத்தின் அளவையும்,கொடூரத்தையும் பார்ப்பதைக் குறைக்கும்.அதனால் அவரின் பதற்றம் மற்றும் பயம் சற்றே குறையும். நைலான் அல்லாத மேசை விரிப்புத்துணி,துண்டு,சால்வை உள்ளிட்டவை உடலை மூடுவதற்கு மிகவும் உகந்தவை. உடலின் மேல் லேசாக மற்றும் அழுந்தாமல் மூட/போர்த்த வேண்டும்.

    மருத்துவர் அல்லது ஆம்புலன்ஸிற்காகக் காத்திருக்கும் போது விபத்துக்குள்ளானவரை மீண்டும் தேற்றுங்கள்,ஆறுதல் கூறுங்கள். குழந்தையாக இருப்பின் அரவணைத்து எடுத்துச்செல்லுங்கள். அப்படி செய்வது மிகமுக்கியம். ஆனால் அப்படி செய்யும்போது பாதிப்பு ஏற்படாத வண்ணம் ஜாக்கிரதையாக இருக்கவும்.

சிறப்பு சிகிச்சை தேவைப்படும் தருணங்கள்

துணிகளில் ஏற்படும் தீ

    துணிகளில் தீ பற்றியெரியும் போது, தீயைத் தண்ணீர் ஊற்றி அணைக்கவும். விபத்துக்குள்ளானவரின் மீது கெட்டித்துணி,போர்வை,கோட்,சாக்கு/கோணி போன்றவற்றால் சுற்றி அணைக்கலாம்.நீங்கள் விபத்துக்குள்ளானவரை போர்வை கொண்டு சுற்றும் போது தீயானது உங்களைத் தாக்காதவாறு போர்வையை உங்களுக்கு முன் இருக்கும் வண்ணம் வைத்துக்கொள்ளுங்கள்

    ஒருவன் தீயில் பயங்கரமாக பற்றியெரியும் போது, வலி தாங்க முடியாமல் ஒரு அறையிலிருந்து மற்றொரு அறைக்கு ஓடலாம்.இதனால் தீயானது வேகமாகப் பரவும்.அவர் காற்றோட்டமான பகுதிக்கும் ஓடலாம். அப்படி காற்றோட்டமான பகுதிக்கு செல்லும் போது தீ அதிகமாகப் பற்றியெரியும். எனவே விபத்துக்குள்ளானவரை ஒரே இடத்தில் இருக்கும்படி செய்யவேண்டும்.

    தீ அணைந்துவிட்டால்,ஏற்கெனவே கூறியுள்ள பொதுவான சிகிச்சைகளைத் தொடர்ந்து அளிக்கவேண்டும்.

கண்களில் வேதிப்பொருள் தெளிப்பு

இது நிரந்தரமான பாதிப்பு மற்றும் பார்வை இழப்பையும்கூட ஏற்படுத்தும். எனவே சிகிச்சை அளிப்பதில் அதி வேகமாக செயல்பட வேண்டும். அவ்வேதிப்பொருளின் வீரியத்தைக் குறைப்பதற்கான நடவடிக்கையை மேற்கொள்ள வேண்டும்.


    விபத்துக்குள்ளானவரை மல்லாக்காக படுக்கவைத்து, அவரின் கண்ணிமைகளை கட்டை விரல் மற்றும் ஆள் காட்டி விரலைக்கொண்டு கண்களை திறந்த வண்ணம் வைத்து, கண்ணில் தொடர்ந்து குளிர்ந்த நீரை மூக்குப்பக்கமாக இருந்து ஊற்றவும் ( அவ்வாறு செய்வது வேதிப்பொருள் மற்றொரு கண்ணை பாதிக்காமல் பாதுகாக்கிறது)

    
கண்ணிமைகளுக்குள் வேதிப்பொருட்கள் தங்காமல் இருக்க, கண்ணிமைகளை பல முறை மூடி மூடி திறக்குமாறு செய்யுங்கள்.
    இப்படி கண்களைக் கழுவும் செயலைக் குறைந்தது 10 நிமிடங்களாவது தொடர்ந்து செய்யுங்கள்.

    சிகிச்சைக்கு பின் கண் இமைகளை மூடி அதன் மேல், துணியை வைக்கவும் (கண்களுக்கு அழுத்தம் கொடுக்காமல் இலகுவாக இருக்கும்படி வைக்கவேண்டும்)

    விபத்துக்குள்ளானவரை தேற்றி, ஆம்புலன்ஸை அழையுங்கள் அல்லது அவரை மருத்துவரிடம் கொண்டுசெல்லுங்கள்.

மின்சார தீக்காயங்கள்

இவை பொரும்பாலும் சிறிய அளவில் இருக்கும் ஆனால் ஆழமானதாகவும், அதிக பாதிப்புகளுடனும் இருக்கும். மின்சாரம் தாக்கப்பட்ட இடங்களில் காயங்கள் காணப்படும்.

    விபத்துக்குள்ளானவருக்கு சிகிச்சை அளிக்கும் முன் மின் இணைப்பைத் துண்டிக்கவேண்டும்.

    மின்சார விபத்துக்குள்ளானவர் தண்ணீருக்குள் கிடந்தால், நீங்கள் தண்ணீரிலிருந்து சற்றே விலகி நின்று செயல்படுங்கள்.ஏனெனில் தண்ணீர் ஒரு நல்ல மின் கடத்தி. எனவே விபத்துக்குள்ளானவரின் அக்குள் பகுதியைப் பிடித்துத் தூக்காதீர்கள்.

    விபத்துக்குள்ளானவரின் சுவாசத்தை சரிபாருங்கள். மின்சாரம் மார்பு வழியாக பாய்ந்திருக்கலாம்.அதனால் இதயத்துடிப்பு மற்றும் சுவாச மூச்சை நிறுத்திவிடக்கூடும். அப்படி இருப்பின் கிஸ் ஆஃப் லைஃப் (வாய் மீது வாய் வைத்து மூச்சு அளிக்கும் முறை)என்ற முறையினையும் மற்றும் மார்பு பகுதியில் கைகளால் அழுத்தமான இயக்கம் கொடுத்து மசாஜ் செய்தலையும் உடனடியாக ஆரம்பிக்கவும்.

    தீக்காயங்களுக்கான பொதுவான சிகிச்சையைத் தொடர்ந்து செய்யுங்கள்

அடிக்கடி கேட்கப்படும் கேள்விகள்

1. தீப்புண்ணைக் குளிர்விக்கப் பனிக்கட்டியைப் பயன்படுத்தலாமா?

கூடாது. தண்ணீரை மட்டுமே பயன்படுத்த வேண்டும். பனிக்கட்டி தோலை மேலும் சிதைவடையச் செய்யும்

2. தீப்புண்ணில் தொற்று பரவாமல் இருக்கக் கட்டு இடலாமா?

ஒட்டும் கட்டுகளைப் புண்ணின் மேல் இட்டால் தோலுக்கு மேலும் சேதாரம் ஏற்படும். தொற்று பரவாமல் தடுக்க ஒரு பிளாஸ்டிக் மென்படலம் அல்லது பையை பயன்படுத்தலாம்.

3. தீப்புண்ணில் துணித்துண்டுகள்  சிக்கி இருந்தால் எடுக்க முனையலாமா?

கூடாது. தீய்ந்த பகுதிக்கு அருகில் உள்ள துணி அல்லது நகை போன்றவற்றை அகற்றலாமே தவிர தீக்காயத்தில் ஒட்டி இருக்கும் எதையும் அகற்ற முயற்சி செய்யக் கூடாது. ஏனெனில் மேலும் சேதாரம் ஏற்படலாம்.

4. தீக்காயம் ஏற்பட்டால் செய்ய வேண்டியவை

    காயம் கடுமையாக இருந்தால் மருத்துவ ஊர்தியை அழைக்கவும். குழந்தைகளுக்கும் முதியவர்களுக்கும் தீக்காயம் ஏற்பட்டிருந்தாலும், மின்சாரத்தினால் அல்லது வேதிப்பொருட்களினால் தீக்காயம் ஏற்பட்டிருந்தாலும், காயம் முகம் அல்லது பிறப்புறுப்புகளில் இருந்தாலும் உடனடியாக சிகிச்சை அளிக்க வேண்டும்.

    காயம் பட்டவர் இயல்பாக சுவாசிக்கவில்லை என்றால் செயற்கை சுவாசம் அளிக்கவும்.

    காயம் பட்ட இடத்தில் ஒட்டிக்கொண்டு இருக்கவில்லை என்றால் மட்டுமே நகைகளையும் துணிகளையும் அகற்ற முயற்சி செய்ய வேண்டும்.

    10 நிமிடத்தில் இருந்து அரைமணி நேரம் வரை  தீக்காயத்தை மென்மையாப் பாயும் தன்ணீரில் காட்டவும்.

வேதிப் பொருட்களால் காயம் ஏற்பட்டிருந்தால் விழித்திரை பாதிக்கப்படாமல் இருக்க தண்ணீர் அல்லது உப்பு நீரால் உடனடியாகக் கழுவவும்.    அவயவங்களில் இரண்டாம் நிலை தீப்புண் இருந்தால் அவற்றை இதயத்தை விட உயர்ந்த நிலையில் வைக்கவும்.

அதிர்ச்சியைக் குறைக்கவும், உடல் வெப்ப இழப்பைத் தவிர்க்கவும், சுத்தமான, உலர்ந்த, பஞ்சு போல் அல்லாதத் துணியை புண் மேல் மென்மையாக இடவும்.

    மருத்துவ ஊர்திக்காக காத்திருக்கும் போதும் மருத்துவ மனைக்குக் கொண்டு செல்லும் போதும் காயம் பட்டவரை, குளிர்ச்சியான, ஈரமான, பஞ்சுத்ததன்மையற்ற துணியால் மூடவும்.

5. தீக்காயம் பட்டால் செய்யக் கூடாதவை

 தீக்காயத்தின் மேல் தைலம், வெண்ணெய், கிரீஸ், எண்ணெய் போன்றவற்றைத் தடவுதல்

    ஐஸ் பயன்படுத்துதல் (பனிக்கடுப்பு உண்டாக்கும்

முதியோர் பராமரிப்பு

முதியோர் பராமரிப்பு 

1) மக்கள் தொகை வளர்ச்சிக்கு (Population explosion) காரணங்கள்
2)  வயது முதிர்ச்சியடைவதின் முக்கிய குறிப்புகள்
3) முதியவர்களிடம் காணப்படும் நோய்கள்
4) நோய்த்தடுப்பு (Immunization)
5) மனநலம்
6) மனஅழுத்தம் (Depression)
7) உணர்ச்சிமண்டலம் (Sensory System)
 8) பொதுவான நோய்கள்
 9) வயதான நோயாளிகளின் கவனிப்பு வகைகள் (Types of elderly case services)
10) வயதான நோயாளிகளுக்கு ஆலோசனை(Counseling the older patients)

 இந்த இருபதாம் நூற்றாண்டில் பல நாடுகளில் போர், பஞ்சம், வெள்ளம், மேலும் இயற்கை மற்றும் மனிதனால் ஏற்படும் பேரழிவுகள் இருந்தபோதிலும் குறிப்பிடத்தக்க வகையில் மக்கள் தொகை அதிகரித்துக் காணப்படுகிறது.



மக்கள் தொகை வளர்ச்சிக்கு (Population explosion) காரணங்கள்

நினைக்கமுடியாத வகையில் சமுதாய பொருளாதார வளர்ச்சி, தடுப்பு மருந்து மற்றும் ஆண்டிபயாடிக்குகள் கண்டுபிடித்தல், மற்றும் சிறந்த பொது சுகாதார கவனிப்பு, மக்கள் இப்போது வயது வந்த காலங்களில் நோயில்லாமல் இருப்பதைவிட வயதானவர்களும் நல்ல வாழ்க்கையே வாழ்கின்றனர். 60 வயதுக்கு மேற்பட்டவர்களின் எண்ணிக்கை மற்ற பிரிவுகளை விட அதிகமாக இருக்கிறது.

செவிலியர்களுக்கும், மற்ற சுகாதார பணியாட்களுக்கும் வயதானவர்களை கவனிக்கும் முறையைப் பற்றி தெரிந்திருக்க 'வேண்டும். வயதானவர்களின் சுகாதார தேவைகள் மற்ற வயதினரிடமிருந்து வேறுப்பட்டது.


வயதானவர்களுக்கு கொடுக்கப்படும் உடல்நல கவனிப்பின் நோக்கங்கள் - வாழ்க்கையை அனுபவிக்கவும். முடிந்த அளவு சுறுசுறுப்பாக இயங்கவும், சுதந்தரமாக இருக்கவும், நலவாழ்வுப் பிரச்சினை உடையவர்களுக்கு சிகிச்சை யளிக்கவும் மற்றும் நோய்களிலிருந்து விடுபடவும் பராமரிப்பு அளிக்கப்படுகிறது.

முதுநிலை

முதுநிலை என்பது நிரந்தரமான ஒன்று இது மேலும் உடல் செயல்பாடுகளை பலவீனப்படுத்துவதுடன் மன அழுத்தம் மற்றும் முதுநிலையில் ஏற்படும் நோய்களை அதிகப்படுத்துகிறது. இதன் விளைவாக முதிர்ந்த வயதில் ஏற்படும் இறப்பு விகிதம் அதிகம் எனக் கூறலாம்.


வயது முதிர்ச்சியடைவதின் முக்கிய குறிப்புகள்

உயிரியல் செயல் (Biological Process)

* மரபணுக்கள் வாழ்நாட்களை நிர்ணயிக்கிறது. எனவே முதிர்ச்சியடைவதில் மரபணுக்கள் முக்கிய பங்கு வகிக்கிறது.

* தொடர்ந்து செயல்படுவதால் உடல் உறுப்புகள் பாதிக்கப்படுகிறது.

* உடலின் முக்கிய உறுப்புகளான இருதயம், மூளை போன்றவற்றில் நச்சு பொருட்களான கொலஸ்ட்ரால், அமிலாய்டு (Amyloid) போன்றவை தேங்கி அவற்றை பாதிக்கின்றன.

* DNA பழுதுபார்க்கப்படும்போது ஒரு சில முக்கியமான மரபுப்பொருட்கள் மறைந்து போகின்றன.

* குறைவுபட்ட முக்கிய ஹார்மோன்களை உற்பத்தி செய்வதில் தளர்வு எ.கா: வளர்ச்சி ஹார்மோன், ஆண்ட்ரோஜன், ஈஸ்ட்ரோஜன் மற்றும் தைராய்டு ஹார்மோன்கள்.

* வாழ்நாளில் ஏற்படும் அழுத்தங்கள், மேலும் அதனால் ஏற்படும் விளைவுகள்

* சுற்றுசூழல் நச்சு மற்றும் இடையூறுகளுக்கு நீண்டகாலம் உட்படுதல் Exposure)

வயதின் பரிணாம நிலை (Evolutionary Basis of Ageing)

பரிணாம வளர்ச்சியில் வயதும் இணைக்கப்பட்டுள்ளது. இனப்பெருக்க வயது (அ) காலத்திற்கு பிறகு நீண்ட வாழ்நாள் பயனற்றது. இல்லையென்றால் மக்கள் தொகை பெருக்கமும், வாழ்வதற்கு பொருளாதார போட்டியும் ஏற்படும்.

முதிர்வயதில் மனநிலை சமூகபார்வை (Psycho-social aspects of ageing)

வயதானவர்களுக்கு தோற்றத்தில், பழக்க வழக்கத்தில், நினைவாற்றலில் மற்றும் மன நிலையில் சில மாற்றங்கள் ஏற்படும். வயதானவர்கள் தங்கள் இடத்தை இளைய தலைமுறைக்கு விட்டுக் கொடுக்கவேண்டும். அவர்களுக்கு தாங்கள் பாதுகாப்பற்றவர்கள், தேவையற்றவர்கள் மற்றும் பிறரை சார்ந்திருக்கவேண்டுமே என்ற மனநிலை உருவாகலாம்.


முதியவர்களிடம் காணப்படும் நோய்கள்

கீழ்கண்ட நோய்கள் பொதுவாக வயதானவர்களுக்கு இருக்கும் என மருத்துவமனைகள் கூறுகின்றன:

* உயர் இரத்த அழுத்தம், கண்ணில் புரை ஏற்படுதல் (Cataract), எலும்பு மூட்டுகளில் தேய்மானம், நீண்டநாட்கள் மூச்சுப்பாதை அடைப்பு நோய்கள், இருதயநோய், சர்க்கரைநோய், புரோஸ்டேட் சுரப்பி வீக்கம், செரிப்பு கோளாறு மற்றும் மலச்சிக்கல், மன அழுத்தம்

வயதானவர்களுக்கு ஏற்படும் இறப்புகளுக்கான பொதுவான காரணங்கள்

• மூச்சுக்குழல் அழற்சி மற்றும் நிமோனியா

* இருதய நோய்

* நோய் வன் தூக்கி (Strokes) (அ) வாதம்

* புற்றுநோய்

* காசநோய்.

வயதானவர்களிடம் கவனிக்க வேண்டிய சுகாதார பிரச்சனைகள்

* மாறுபட்ட ஊட்டச்சத்து, மிக அதிகமான ஊட்டச்சத்து, மிகவும் குறைந்த ஊட்டசத்து.

* நார் தன்மை உணவு மற்றும் பழங்கள் குறைவாக சாப்பிடுதல்

* உடல் இயக்கங்கள் குறைவுபட்டு, சுறுசுறுப்பில்லாத வாழ்க்கை முறை (Sedantary Life style),

* புகைபிடித்தல்

* அதிகமாக ஆல்கஹால் பருகுதல்

* மருந்தினால் ஏற்படும் விளைவுகள்

* விபத்து மற்றும் காயங்கள்

அதிக ஊட்டசத்து (Over Nutrition) :

ஊட்டசத்து அதிகமாவதால் உடல்பருமன் அதிகரித்து உயர் இரத்த அழுத்தம், இருதய நோய் மற்றும் சர்க்கரைநோய் போன்றவை ஏற்படும். இவை வயதானவர்களுக்கு ஏற்படும் பொதுவான சுகாதார பிரச்சினைகளாகும்.

குறைந்த ஊட்டசத்து (Under- Nutrition):

இதுவும் சம அளவு கேடு நிறைந்தது. இதனால் உடலளவில் தன் வேலையை செய்ய முடியாமல் மற்றவர்களை சார்ந்திருத்தல், நோய்தடுப்பு குறைந்து காணப்படுவதால் வெகு விரைவில் ஏற்படும் இறப்பு, அதிகமான நோய்த்தொற்று மற்றும் காயம் மெதுவாக குணமடைதல் ஆகியவை காணப்படும்.

சில மனநிலை சமூக காரணங்கள் :

உணவு உட்கொள்ளுதலை பாதிக்கும் காரணங்கள் எகா. பொருளாதார நிலை. உணவு பற்றிய கட்டுப்பாடுகள் (சூடு மற்றும் குளிர்ச்சி), மதநம்பிக்கைகள், சமூக கட்டுப்பாடுகள், கவனிப்பவரின் விருப்பமில்லாமை மற்றும் பழிந்துரை, மன அழுத்தம், தனிமை.

பொதுவான ஊட்டசத்து குறைகள் :

இதில் மொத்த கலோரிகள், இரும்புசத்து, நார்சத்து, போலிக் அமிலம், விட்டமின் C, கால்சியம், துத்தநாகம் மற்றும் விட்டமின் A போன்றவைகள் அடங்கும்.

உடற்பயிற்சி :

வயதான காலங்களில் சக்தி, பலம், எலும்பு மற்றும் இருதயதசைகளின் தன்மை போன்றவை படிப்படியாக குறைந்து காணப்படும். சுறுசுறுப்பற்ற மற்றும் உடல் இயக்கங்கள் குறைந்து போவது, நோய் மற்றும் இறப்பு போன்ற பாதிப்புகளுக்கு முக்கிய காரணமாகும்.

புகைபிடித்தல் :

வயதானவர்களுக்கு ஏற்படும் இறப்பு நோய்களுக்கு (Fatal disease) முக்கிய காரணம் சிகரெட் புகைப்பது. புகைபிடித்தல் கீழ்கண்டவைகளுக்கு காரணங்கள்

* வயதானவர்களுக்கு ஏற்படும் மூச்சுபிரச்சனைகள்

• நுரையீரல் மற்றும் இரைப்பை குடல்பாதை புற்று நோய்

* இருதயநோய்

* வாதநோய் (Stroke)

ஆல்கஹால் :

அதிகமாக ஆல்கஹால் உட்கொள்வதால் இருதயவீக்கம், கல்லீரல் அழற்சி, நரம்புகள் பாதிப்பு, நினைவின்மை, கீழே விழுதல் மற்றும் விபத்துகள், குறை உணவூட்டம், நோய்தடுப்பில் குறைவு மற்றும் சமூகத்தில் இருந்து தனிமைபடுத்துதல் போன்றவைகள் உண்டாகும்.

வலி நீக்கிகள் மற்றும் மத்திய நரம்புமண்டல அழுத்திகளான தூக்கமருந்துகள், டிரைசைகிளிக் அழுத்த நீக்கிகள், பரபரப்பை குறைப்பவை மற்றும் பென்சோ டையபினைன்கள் போன்றவைகளின் பலன் அ) செயல் அதிகமாக ஆல்கஹால் உட்கொள்வதால் பாதிக்கப்படும்.

ஆல்கஹாலுக்கு அடிமையாவதால், நினைவின்மை, சமநிலை பாதிப்பு அடிக்கடி கீழே விழுதல் மற்றும் மோசமான உடல்நலமின்மை போன்றவைகள் முதுநிலை நோய்கள் என்று தவறாக ஊகிக்கப்படுகிறது.

சிகிச்சை

நீண்ட நாட்கள் ஆல்கஹால் குடிப்பவர்களுக்கு சிகிச்சையளிப்பது கடினம். அவர்களை மருத்துவமனையில் அனுமதித்து, ஊட்டச்சத்து பராமரிப்பு, மனநிலை பராமரிப்பு மற்றும் ஆலோசனை சிகிச்சை போன்றவைகளால் சிகிச்சையளிக்கப்படவேண்டும்.

செவிலியர்கள் நோயாளிகளுக்கு ஆல்கஹால் குடிப்பதன் விளைவுகள் மற்றும் De-addiction முதலியவற்றை எடுத்துரைக்க வேண்டும்.

விபத்துக்களை தடுத்தல்

வலி, காயம், உறுப்புகள் வேலை செய்யாமை, நீண்ட நாட்கள் அசையாதன்மை மற்றும் சிக்கல்கள், எதிர்கால விபத்துக்களைப்பற்றிய பயம், தனிமை மற்றும் சுதந்திரமனப்பான்மை இழத்தல் போன்றவை விபத்துகளில் அடங்கும்.

சராசரியான வயதில் இருப்பவர்களைவிட வயதானவர்களுக்கு ஏற்படும் விபத்துகள் அதிகம் ஏனென்றால் உணர்ச்சி மற்றும் தசை எலும்பு மண்டலத்தில் ஏற்படும் மாற்றங்களே காரணமாகும். இந்த மாற்றங்களில் கீழ்கண்டவை அடங்கும்.

* புலன் உறுப்புகள் பழுதடைதல் - பார்வை, கேட்டல், வலி தொடுதல், வெப்பநிலை.

* உடல் சமநிலையில் சரிவு

* நிற்கும் தோரணை மற்றும் நடக்கும் முறையில் பாதிப்பு

* தசைவலிமை மற்றும் ஒருநிலைப் படுத்தல் குன்றிப்போதல்

வயதானவர்கள் கீழே விழுந்து, விபத்து ஏற்பட மற்ற சில காரணங்களும் உண்டு. அவை

* நினைவாற்றலில் பாதிப்பு

* மனக்குழப்பம்

* நீண்ட நாட்கள் உடல் நலமின்மை

* இருதய நோய்களுக்கு மருந்துகளை பயன் படுத்துதல்

* மன அழுத்தம்

செவிலியர், வயதானவர்களுக்கு விபத்துகள் ஏற்படும் காரணங்களையும் சுற்றுச்சூழல் சீர்கேடுகளையும் பற்றி நன்கு தெரிந்து கொள்ளவேண்டும். மேலும் அவற்றை சரிசெய்வதற்கு தேவையான எளிய மற்றும் நவீன முறைகளையும் தெரிந்து கொள்ளவேண்டும். அவை.

* நடப்பதற்கான சாதனங்களை பயன்படுத்துதல்

* பார்வை கருவிகளை பயன்படுத்துதல்

* தட்டையான காலணிகளை பயன்படுத்துதல்

* வீட்டிற்கு உள்ளேயும் மற்றும் வெளியேயும் சரியான தரை அமைப்பு.

மருந்து செயல்களினால் ஏற்படும் பக்கவிளைவுகளை தடுத்தல்

பொதுவாக மருந்துகளுக்கு எதிராக ஏற்படும் விளைவுகள் ஆண்டிபயாடிக்குகள், சிறுநீர் உற்பத்தியை அதிகரிக்கும் மருந்து, இருதய துடிப்புகளை சரிசெய்யும் மருந்துகள், டிஜாக்சின் அழற்சியை தடுக்கும் மருந்துகள், தூக்கமருந்துகள், மன அழுத்தத்தை நீக்கும் மருந்துகள், உயர் இரத்த அழுத்தத்தை தடுக்கும் மருந்துகள் இரத்தம் உறைதலை தடுக்கும் மருந்துகள் மற்றும் மனநோய் மருந்துகள்.

பொதுவாக மருந்துக்கு மாறாக ஏற்படும் செயல்கள் (Adverse reaction மனக்குழப்பம், மூளைக்கோளாறு, குறைந்த இரத்த அழுத்தம், கீழே விழுதல், படபடப்பு, மன அழுத்தம், துக்கமின்மை, மலச்சிக்கல், சிறுநீரை கட்டுப்படுத்த முடியாத நிலை மற்றும் சிறுநீர் தேங்கியிருத்தல்.

இந்த விளைவுகளை குறைக்க செய்யப்படவேண்டியவை:

• மருந்துகளை பற்றி அடிக்கடி மருத்துவரிடம் ஆலோசனை கேட்டறிதல்

* ஏற்படக்கூடிய பக்கவிளைவுகளைப் பற்றிய குறிப்பு

* பயன்படுத்தும் மருந்துகளின் எண்ணிக்கையை குறைத்தல்

* அதிகப்படியான பக்கவிளைவுகள் இல்லாத மருந்துகளை பயன்படுத்துதல்.


நோய்த்தடுப்பு (Immunization)


கீழ்காணும் மூன்று நோய்க் காரணிகளுக்கான தடுப்பு மருந்து பரிந்துரைக்கப் படுகிறது.

நியூமோகாக்கஸ், இன்புளுன்சா வைரஸ் மற்றும் டெட்டனஸ்

நியூமோகாக்கஸ், தடுப்பூசி மருந்து ஒரே ஒரு முறை கொடுக்கப்பட வேண்டும். இன்புளுன்சா தடுப்பு ஊசி ஒவ்வொரு வருடமும் கொடுக்க பரிந்துரைக்கப்படுகிறது.


மனநலம்

முதிர்வயதில் ஏற்படும் மன அழுத்தங்கள்: வயது முதிர்ந்தவர்களுக்கு சூழ்நிலையினால் ஏற்படும் பொதுவான பிரச்சனைகள்


* கணவன் அல்லது மனைவி இழந்த நிலை மற்றும் மிகவும் நெருக்கமானவர்களின் இறப்பு

• வயதானவர்களை கவனிப்பவர்களுக்கு ஏற்படும்

மன அழுத்தம் மற்றும் உடன்பிறப்புகள், உறவினர்களின் நோய், இறப்பை பற்றிய பயம்

* பொருளாதார பிரச்சனை மற்றும் சுதந்தரமற்றநிலை

* சமூகத்தில் தனித்துவைக்கப்படல் மற்றும் தனித்தநிலை

வயது முதிர்ச்சியும் அதன் பிரிவுகளும்

• கீழ்கண்ட பிரச்சனைகளாலும் மனநிலை பாதிக்கப்படும்

* சோர்வு, பயம், தனிமை, அர்த்தமற்ற வாழ்க்கை மற்றும் குறிக்கோள் இல்லாமல் இருத்தல். படபடப்பு, கோபம், திறமை அ) வலிமையற்றநிலை மற்றும் மன அழுத்தம்.


வயதான காலங்களில் ஏற்படும் மனநோய்கள்

உடல் நல குறைபாடுகள் மனநல குறைபாட்டை அதிகப்படுத்துகிறது

.

* மன அழுத்தம்

* படபடப்பு நோய்கள்

* தவறான மனப்பான்மை

* அப்சஸ்சிவ் கம்பல்சிவ் பிரச்சனை

* தனிப்பட்ட பிரச்சனை (Personality disorder)

* பாதுகாப்பற்ற உணர்வு

* மது அருந்துதல்

* மருந்துகளுக்கு அடிமையாதல்

* பேச்சு குழறுதல் மற்றும் மறந்துபோதல்


மனஅழுத்தம் (Depression)

உடல்நலக்குறைவு, தூக்க பிரச்சனை மற்றும் உடல் தளர்வுறுதல் போன்றவை பொதுவான அறிகுறிகளாகும். மற்ற அறிகுறிகள் பசியில்லாத தன்மை, இறப்பை பற்றிய நினைவு, கவனக்குறைவு மற்றும் அதிகமாக வியர்த்தல்.


வயதானவர்களுக்கு உண்டாகும் மன அழுத்தத்துக்கு காரணங்கள் - மரபுத்தன்மை, நீண்ட நாட்கள் நோய் மற்றும் நடமாட்டம் இல்லாமல் இருத்தல், வலி, தினசரி வாழ்க்கையில் செயல் குறைவினால் ஏற்படும் வெறுப்பு, நிர்வகிப்பதில் மாற்றம், வாழ்க்கை நிகழ்வுகளின் பக்கவிளைவுகள் மற்றும் சமூக ஒத்துழைப்பு இல்லாமை.



மன அழுத்தத்தினால் வாழ்க்கையில் மகிழ்ச்சியும், வாழ்க்கை தரமும் அழிந்துவிடும்.


மன அழுத்தமும் செயல் திறமையும் பாதிக்கப்பட்டால் நோயின் முன்னேற்றம் மிகவும் மோசமாக இருக்கும். நோயாளிக்கும், அவரது குடும்பத்தினருக்கும், நோயின் தன்மை, சிகிச்சை, நோயின் முன்னேற்றம் மற்றும் தற்கொலை முயற்சி போன்றவற்றைப்பற்றி போதனை அதிகம் தேவை. சிகிச்சையில் மூன்றில் ஒரு பங்கு நோயாளி சுகமடையலாம். ஒருபங்கு அப்படியே இருப்பார்கள் மற்றும் இன்னும் ஒரு பங்கு மோசமான நிலையை அடைவார்கள்.


உணர்ச்சிமண்டலம் (Sensory System)

தோல் (Skin) வயது சார்ந்த மாற்றங்கள்

புறத்தோல் தடித்து, தோலின் ஈரத்தன்மையை குறைந்து, தோலை உலர்ந்ததாகவும், கடினமானதாகவும் மாற்றுகிறது. மெலனின் நிறமிகளின் எண்ணிக்கை குறைவதால் சூரிய வெளிச்சத்திலிருந்து தோல் பாதுகாப்பு குறைந்து நிறமற்ற புள்ளிகள் தோலின் மேல் தோன்றும். உட்தோலில் பைப்ரோபிளாஸ்ட் (Fibroplast) எண்ணிக்கையும், செல்லுலார் மெஸ்மட்ரிக்ஸ் Cellular matrix) உற்பத்தியும் குறைக்கப்படுவதால் தோலின் மேற்பரப்பில் சுருக்கங்கள் ஏற்படும்.


மெலனின் நிறமி இல்லாத காரணத்தால் தலைமுடி நிறமிழந்து, முடி உதிர்தல் நடைபெறும், நகங்களின் வளர்ச்சி குறையும்.

பொதுவான நோயின் நிலைகள்

தொற்று ஹெர்பிஸ் போஸ்டர் : சொறி சிரங்கு மற்றும் பையோ டெர்மா (Pyoderma), தோலில் அரிப்பு (Pruritis) தோலின் உலர்ந்த தன்மை (அ) பொதுவான நோய்கள்.

ஸிரோஸிஸ் (Xerosis) : வயது முதிர்ச்சியினால் தோலின் வறண்ட மற்றும் கடினமான தன்மை, மருந்துகளின் எதிர் செயல்.

கண்

தளர்வுற்ற நிலையில், கருவிழிப்படலத்தின் சுழற்சி மாற்றப்படுவதால் கண்ணீர் வழிதலில் பிரச்சனை ஏற்படும். கண்ணீர் சுரப்பியின் சுரப்பு தன்மை குறைந்து காணப்படுவதால் கண் உலர்ந்திருக்கும்.


விழி வெண்படலத்தில் இருக்கும் இரத்தக் குழாய் மோசமான நிலையில் இருப்பதால் விழிவெண்படலத்தில் இரத்தக்கசிவு ஏற்படலாம்.

விழிலென்சில் ஒளி ஊடுருவும் தன்மை பாதிக்கப்படும். லென்சு பாதிக்கப்படுவதால் கண்புரை (Catact) ஏற்படும்.


நிறப்பார்வையில் பாதிப்பு ஏற்படும். அதாவது நீலம், பச்சை மற்றும் ஊதா நிறங்களைவிட சிவப்பு, ஆரஞ்ச் மற்றும் மஞ்சள் நன்றாகத் தெரியும்.


பொதுவான நோய்கள்

வயதானவர்களின் பார்வை குறைவுக்கு கண்புரை (Catract பொதுவான காரணமாகும்.

வலியற்ற மங்கலான பார்வை, படிப்படியாக பார்வை குறைதல், வெளிச்சத்தில் கண் கூசும் தன்மை அதிகரித்தல் மற்றும் பொதுவாக இருண்ட பார்வை போன்றவை கண்புரையில் காணப்படும்.

அடையாளங்களும் அறிகுறிகளும்


* அடிக்கடி கண்ணாடியை மாற்றுதல்

* படிப்பதற்கு அதிக வெளிச்சம் தேவைப்படுதல்

• இரவில் பார்வை குறைவாக இருத்தல்

* மங்கலான பார்வை

சிகிச்சை :

அறுவை சிகிச்சையில் லென்சை எடுத்துவிட்டு Intra - Ocular lens-ஐ பொருத்துவதால் பழைய முறையில் பார்வை கிடைக்கும்.

கிளாக்கோமா (Glaucoma)

இந்த நிலையில், கண்ணின் உள் அழுத்தம் அதிகமாக இருக்கும், இதற்கு சிகிச்சையளிக்கப்படாவிட்டால் பார்வை இழந்து போகக்கூடும்.


நீண்ட நாள் கிளாக்கோமாவில் பக்கவாட்டில் பார்வை பாதிக்கப்படக்கூடும். பொதுவாக பார்வை இழப்பு விழியின் பக்கங்களில் இருந்து தொடங்கும். இதற்கு 'tunnel vision' என்று பெயர். இந்த நோயைக் கண்டறிய ஒரு சிறப்பு கருவியை பயன்படுத்தி கண்ணின் உள் அழுத்தத்தை கண்டறிய வேண்டும்.


குறுகலானகோண கிளாக்கோமாவில் அதிகமான வலி, தலைவலி, குமட்டல், வாந்தி மற்றும் மங்கலான பார்வை ஆகியவை காணப்படும்.

மாக்குயூலர் பாதிப்பு (Macular degeneration) :

வயதானவர்களின் பார்வை குறைவுக்கும், பார்வை இழந்து போதலுக்கும் இது பொதுவான காரணம். Exudative மாக்குயூலர் பாதிப்பினால் தந்துகிகளில் கசிவு ஏற்படும் ரெட்டினாவில் இரத்தக்கசிவு ஏற்படும் Laserphoto-coagulation இதற்கு பயனுள்ளதாக இருக்கும்.


இந்த தன்மையில் ரெட்டினாவில் நிறமி எபிதீலியம் மற்றும் தந்துகிகள் பாதிக்கப்படுவதால் ஒளிமுறிவு செயல் பாதிக்கப்படும். இந்த நிலைக்கு சிகிச்சை இல்லை.


டையபடிக் ரெட்டினோபதி : (Diabetic Retinopathy) இது சர்க்கரை நோயினால் ஏற்படும் பொதுவான சிக்கல் சர்க்கரை நோயின் காலம் மற்றும் தடுப்பு சிகிச்சையை பொறுத்து இந்த நோய் அமையும், இதைத் தடுப்பதற்கு முதலில் இரத்தத்தில் சர்க்கரையின் அளவு சீரான நிலையில் இருக்க வேண்டும். தொடர்ந்து பரிசோதனை செய்வது, சிகிச்சையில் முக்கியமானது.


பரிசோதனை மற்றும் Laser Photo Coagulation மூலம் இன்றைய நாட்களில் ரெட்டினோபதி சிகிச்சையில் முன்னேற்றம் ஏற்பட்டுள்ளது.

செவி

வயது முதிர்ந்த காலங்களில் செவி உணர்ச்சி உறுப்புகளின் அமைப்பில் மாற்றம் ஏற்பட்டு ganglion மற்றும் hair செல்களின் எண்ணிக்கை குறைந்து காணப்படும். காக்ளியாவிற்கு இரத்த ஓட்டம் குறைவாக செல்லும். உணர்ச்சி உறுப்புகளில் உணர்ச்சி நரம்புகள் குறைந்து காணப்படும்.

செவிட்டுத்தன்மை ஏற்படுவதால் சமுதாயத்தில் மற்றவர்களுடன் பழகுவது பேசுவது தவிர்க்கப்படக் கூடியதாகும் கீழ்கண்ட பண்புகள் வயது முதிர்ந்தவரின் கேட்கும் தன்மையை குறிக்கிறது.

வயதானவர்கள் பொதுவாக உரத்த குரலில் பேசுவார்கள், மற்றவர்களும் அவர்களிடத்தில் சத்தமாக பேசவேண்டும் என எதிர்பார்ப்பார்கள்.

வயதானவர்கள் பேசியதையே திரும்ப திரும்ப பேசுவார்கள்.

வயதானவர்கள் அவர்களைப் பற்றியாரும் பேசுகிறார்களா என சந்தேகப் படுவார்கள்.

எப்பொழுதும் கேட்கும் கருவி (hearing aid) பயனுள்ளதாக இருக்கும். அந்தக்கருவியை எவ்வாறு பொருத்துவது, எவ்வாறு பயன்படுத்துவது, பேட்ரியின் வகை, அது எங்கு கிடைக்கும் மற்றும் எவ்வாறு பரிசோதித்து அதை மாற்ற வேண்டும் என்று அந்த வயதானவருக்கும் அவருடைய குடும்பத்தினருக்கும் தெரிந்திருக்க வேண்டும்.

வயதானவர்களுடன் பேசும்போது உரத்த சத்தத்துடன் பேசுவதை விட மெதுவாக குறைந்த சத்தத்தில் பேசுவது பயனுள்ளதாக இருக்கும். சுற்றுசூழல் பின்னனி இரைச்சலை தவிர்க்க வேண்டும்.

காதில் மெழுகு (wax) போன்ற அழுக்கு பொருட்கள் இருக்கிறதா என்று பரிசோதிக்க வேண்டும். இதன் மூலம் கேட்கும் தன்மை பாதிக்கப்படலாம். காதில் சொட்டு மருந்தைவிட்டு அந்த மெழுகு போன்ற அழுக்கை (Cerumen) இளகச்செய்து காதினை சுத்தப்படுத்தவேண்டும்.

சுவை மற்றும் மணம்

நாக்கின் மேற்பரப்பில் சொரசொரப்பான சுவையரும்புகள் எனப்படும் மேடுகள் காணப்படுகின்றன. வயதான காலங்களில் இந்த சுவையரும்புகளின் எண்ணிக்கை குறைந்தும், மீதி இருக்கிற சுவையரும்புகளின் தன்மையும் பாதிக்கப்பட்டு இருக்கும். இதனால் அவர்கள் உண்ணுவதில் மகிழ்ச்சியடைய முடியாது. இந்த சுவையரும்புகளை ஊக்குவிப்பதற்கு மண மூட்டக்கூடிய வாசனைப்பொருட்கள் அதிகம் தேவை.

மூக்கின் மேல் பகுதியில் வாசனை நரம்புகள் காணப்படுகின்றன. வயதான காலத்தில் இந்த வாசனை நரம்புகளின் எண்ணிக்கை குறைந்து காணப்படும்.




எனவே இந்த வயதான நிலையில் உள்ளவர்களுக்கு மணமும், வாசனையும் அறியக்கூடிய பாதிப்பு அதிகம் இருக்கும். அவர்கள் புகையின் வாசனையை உணரமுடியாத காரணத்தால் தீ போன்ற விபத்துகளை உடனே உணரமுடியாது.


வயதானவர்களுக்கும் அவர்கள் குடும்ப த்தினருக்கும் உணர்ச்சி உறுப்புகளில் ஏற்படும் மாற்றத்தைப் போதிக்க வேண்டும். மேலும் ஏற்படும் பாதுகாப்பாற்ற அபாயங்களை குறித்து எச்சரிக்கவேண்டும்.


வயதான நோயாளிகளின் கவனிப்பு வகைகள் (Types of elderly case services)


உடல்நலம் மற்றும் நோய்த்தடுப்பின் சேவைகள்

சுகாதார போதனை (உடற்பயிற்சி, ஊட்டச்சத்து, பொதுவான உடல் நலத்தை பரிசோதித்தல், இரத்த அழுத்தம், இரத்தத்தில் சர்க்கரை மற்றும் கொழுப்பின் அளவு, பார்வை, கருப்பை வாய் புற்றுநோய் பரிசோதனை மற்றும் உடல்நலத்தை மேம்படுத்தக் சில குறிப்பிட்ட நிகழ்ச்சிகளில் பங்கெடுத்தல் (புகைபிடித்தலை தடுத்தல், நோய் தடுப்பு மருந்து)

சிகிச்சை

நோயை முன்னதாக கண்டுபிடித்து ஆரம்ப சுகாதார நிலையங்களில் சிகிச்சையளித்தல். தீவிர மற்றும் மோசமான உடல் பிரச்சினைகளுக்கு மாவட்ட மற்றும் பொது மருத்துவமனைகளில் பரிசோதனையும், சிகிச்சையும் அளித்தல், நீண்ட நாள் சிகிச்சை மருத்துவமனைகளில், நிறுவனங்கள் அல்லது வீடுகளில் அளித்தல்,

மறுவாழ்விப்பு (Retabilitative)

பிசியோதெரபி (physiotherapy) உடல் உறுப்புகளின் வேலைகளை இயக்க அறுவை சிகிச்சை (Restorative surgery), செயற்கை உறுப்புகள் மற்றும் கருவிகள் (prosthesis), தொழில்முறை சிகிச்சை (Occupational therapy), நினைவு பாதிக்கப்பட்டவர்களுக்கு நீண்டநாள் சிகிச்சை

மனநல சேவைகள்

ஓய்வு, மாற்று வசிப்பிடம், துணையை இழத்தல் மற்றும் நெருக்கமானவர்களை இழந்த நிலையில் ஆலோசனை கூறுதல், மருந்து மற்றும் பொருட்களை பயன்படுத்துதல், மனநோய்களுக்கான சிகிச்சை.


வயதான நோயாளிகளுக்கு
ஆலோசனை(Counseling the older patients)
 வயதானவர்கள் பல கோணங்களில் பல பிரச்சனைகளால் பாதிக்கப்பட்டவர்களாக இருப்பார்கள்.

ஒரு சில பிரச்சனைகளுக்கு ஆலோசகர்கள் தேவை:


• வேலையை சரிவர செய்யமுடியாத நிலையைக் குறித்த பயம்

* ஓய்வுபற்றிய அச்சம்

* முதிர்வயதைப்பற்றி தெரிந்திருத்தல்

* உடல் நலக்குறைவு மற்றும் மற்றவர்களை சார்ந்திருந்த்தல்

* பாலின உணர்வு குறைவு பற்றிய பயம், தனிமை

* நெருக்கமானவர்களின் இறப்பும் இயலாமையும்

* சார்ந்திருத்தல் பற்றிய அச்சம் அதிகரித்தல்

* தொழில் பற்றிய ஆலோசனை

* கட்டுப்படுத்தும் தன்மையை இழத்தல்.


வயதானவர்களுக்கான சுகாதார போதனை

மனித உயிரியல் (Human biology) :

வயது முதிர்ச்சியினால் உடல் அமைப்பு மற்றும் வேலையில் ஏற்படும் மாற்றங்கள் குறித்து குடும்பத்தினருக்கு விளக்கி சொல்லவேண்டும் நோய்க்கும், வயதான நிலைக்கும் உள்ள மாற்றங்களை விளக்க வேண்டும். குடும்ப நலம் (Family health) வளர்ச்சி மற்றும் அபிவிருத்தி பற்றி அறிவுறுத்த வேண்டும்.

சுகாதாரம் (Hygiene) :

தன்னுடைய சுத்தம், சுகாதாரம் மற்றும் சுற்றுசூழல் சுகாதாரம்.

நோயாளியின் சுகாதாரப்போதனை

இதில் குளித்தல், ஆடை அணிதல், மலம் கழித்த பின்னும் சாப்பிடுவதற்கு முன்னும் கைகளை கழுவுதல், பாதங்கள் கவனிப்பு, நகம் மற்றும் பற்கள் பராமரிப்பு கண்ட இடங்களில் எச்சில் துப்புவதை தடுத்தல், இருமுதல், தும்முதல் மற்றும் நல்ல பழக்கங்களை கையாளுதல் போன்றவை அடங்கும்.

சுற்றுசுழல் சுகாதாரம் பற்றிய போதனை

இதில் சுத்தமாக வீட்டை வைத்திருத்தல், தூய்மையான காற்று, வெளிச்சம், காற்றோட்டம், சுகாதார முறையில் சேமித்தல், கழிவுகளை அகற்றுதல், தூய்மை பராமரிப்பு, தேவையற்ற உணவுப்பொருட்களை அகற்றதல் மற்றும் பூச்சிகளை கட்டுப்படுத்துதல் போன்றவை அடங்கும். தொற்றாத மற்றும் தொற்றக்கூடிய நோய்களைத் தடுத்தல்.

மனநலம் (Mental Health)

நிலையற்ற மற்றும் பாதுகாப்பற்ற தன்மை வயது முதிர்ந்தவர்களிடையே பொதுவாகக் காணப்படும். வயதானவர்கள் அவர்களுடைய வயது மற்றும் ஓய்வு காரணமாக குடும்பத்திலும், சமுதாயத்திலும் அவர்களுடைய நிலையில் ஏற்படும் மாற்றங்களை அறிந்து அதற்கு ஏற்றவாறு வாழ அவர்களுக்கு போதிக்க வேண்டும். மறதிநிலை, மன அழுத்தம், படபடப்பு, இழந்து போன நிலை போன்றவற்றிற்கும் போதனை அளிக்கவேண்டும்.

விபத்துக்களை தடுத்தல் (Prevention of Accidents)

விபத்துக்களுக்கு உள்ளாக நேரிட அதிக வாய்ப்புகள் உண்டு. பார்வை அல்லது காது கேட்டல் பலவீனம் அடைந்து இருப்பதாலும் அல்லது எலும்புகள் நொறுங்கும் தன்மை அடைந்திருப்பதால் வயது முதிர்ந்தோர் இந்த பாதிப்புகளுக்கும், உயிருக்கு ஆபத்தான காயங்களில் இருந்தும் தங்களை பராமரிக்க தெரிந்திருக்க வேண்டும். இவற்றைத் தடுக்க சிறிய, எளிய முறைகளை அன்றாடம் கையாளுவதன் மூலம் விபத்துக்கான பாதிப்புகளை குறைக்க முடியும்.

ஊட்டச்சத்து (Nutrition)

செவிலியர் வயதான நோயாளியை பராமரிக்கும்போது அவருக்கும், அவருடைய குடும்பத்தினருக்கும் சமசத்துள்ள, எளிதில் சீரணிக்கக் கூடிய நார்சத்து நிறைந்த ஊட்டசத்து அதிகமான உணவுகளைப் பற்றியும் உணவுக்காக செலவிடும் பணம், உணவின் சேமிப்பு, தயாரிப்பு மற்றும் சமைத்தல் பற்றி தெளிவாக விளக்கி அவர்களை பராமரிக்க வேண்டும். மேலும் அவர்கள் குடல் அசைவுகளை அதிகப்படுத்தக்கூடிய உணவுகள், நோய்களில் இருந்து பாதுகாப்பு மற்றும் உடல்நலத்தை மேம்படுத்தக்கூடிய உணவுகள் பற்றி தெரிந்திருக்க வேண்டும்.

வெங்காயத்தின் 50 மருத்துவ குணங்கள் !

வெங்காயத்தின் 50 மருத்துவ குணங்கள் 


வெங்காயத்தை ஆனியன் என்கிறார்கள். இது யூனியோ என்ற லத்தீன் வார்த்தையிலிருந்து தோன்றியது. இதற்கு பெரிய முத்து என்று அர்த்தம்.

வெங்காயத்தில் புரதச்சத்துக்கள், தாது உப்புக்கள், வைட்டமின்கள் உள்ளன. எனவே நம் உடம்புக்கு இது ஊட்டச்சத்து தருகிறது.

பல நாடுகளில் வெங்காயத்தை மருந்துப் பொருளாகப் பயன்படுத்துகிறார்கள். நமது பாட்டி வைத்தியத்திலும், வெங்காயம் முக்கிய இடம் வகிக்கிறது. விஞ்ஞானிகள் வெங்காயத்தின் மகிமையைப் பாராட்டுகிறார்கள்.

வெங்காயத்தை எப்படி பயன்படுத்தினால், என்ன பலன்கள் கிடைக்கும்?

1. நாலைந்து வெங்காயத்தை தோலை உரித்து அதோடு சிறிது வெல்லத்தைச் சேர்த்து அரைத்து சாப்பிட பித்தம் குறையும், பித்த ஏப்பம் மறையும்.

2. சமஅளவு வெங்காயச் சாறு, வளர்பட்டை செடி இலைச் சாற்றை கலந்து காதில்விட காதுவலி, குறையும்.

3. வெங்காயச் சாறு, கடுகு எண்ணெய் இரண்டையும் சம அளவில் எடுத்து சூடாக்கி இளம் சூட்டில் காதில்விட, காது இரைச்சல் மறையும்.

4. வெங்காயத்தைத் துண்டுகளாக நறுக்கி, சிறிது இலவம் பிசினைத்தூள் செய்து சேர்த்து, சிறிது கற்கண்டு தூளையும் எடுத்து, அனைத்தையும் பாலுடன் சேர்த்து சிறிது சாப்பிட எல்லா மூலக்கோளாறுகளும் நீங்கும்.

5. வெங்காய நெடி சில தலைவலிகளைக் குறைக்கும். வெங்காயத்தை வதக்கிச் சாப்பிட உஷணத்தால் ஏற்படும் ஆசனக் கடுப்பு நீங்கும்

6. வெங்காயத்தைச் சுட்டு, சிறிது மஞ்சள், சிறிது நெய் சேர்த்து, பிசைந்து மீண்டும் லேசாக சுடவைத்து உடையாத கட்டிகள் மேல் வைத்துக்கட்ட கட்டிகள் உடனே பழுத்து உடையும்.

7. வெங்காயச் சாறு சில வயிற்றுக் கோளாறுகளை நீக்கும். இதை மோரில் விட்டுக் குடிக்க இருமல் குறையும்.

8. வெங்காயச் சாற்றையும், வெந் நீரையும் கலந்து வாய் கொப்பளித்து, வெறும் வெங்காயச் சாறை பஞ்சில் நனைத்து பல் ஈறுகளில் தடவிவர பல்வலி, ஈறுவலி குறையும்.

9. வெங்காயத்தை சமைத்து உண்ண உடல் வெப்பநிலை சமநிலை ஆகும். மூலச்சூடு தணியும்.

10. வெங்காயத்தை அவித்து தேன், கற்கண்டு சேர்த்து சாப்பிட உடல் பலமாகும்.

11. வெங்காயத்தை வதக்கி வெறும் வயிற்றில் சாப்பிட்டுவர நரம்புத் தளர்ச்சி குணமாகும்.

12. வெங்காயத்தை வதக்கி தேன் விட்டு இரவில் சாப்பிட்டு, பின் பசும் பால் சாப்பிட ஆண்மை பெருகும்.

13. படை, தேமல் மேல் வெங்காயச் சாற்றை தடவ மறைந்துவிடும்.

14. திடீரென மூர்ச்சையானால் வெங்காயத்தை கசக்கி முகரவைத்தால் மூர்ச்சை தெளியும்.

15. வெங்காயச் சாற்றையும் தேனையும் கலந்து அல்லது வெங்காயச் சாற்றையும், குல்கந்தையும் சேர்த்து சாப்பிட்டால் சீதபேதி நிற்கும்.

16. வெங்காய ரசத்தை நீர் கலந்து குடிக்க நன்கு தூக்கம் வரும்.

17.பனைமர பதநீரோடு வெங்காயத்தை நறுக்கிப் போட்டு சூடுபடுத்தி குடித்து வர மேகநோய் நீங்கும்.

18. வெங்காயம், அவரை இலை இரண்டையும் சம அளவு எடுத்து அரைத்து சாப்பிட மேகநோய் குறையும்.

19. வெங்காயம் குறைவான கொழுப்புச்சத்து உள்ளது. எனவே குண்டானவர்கள் தாராளமாக வெங்காயத்தைப் பயன்படுத்தலாம்.

20. பச்சை வெங்காயம் நல்ல தூக்கத்தை தரும். பச்சை வெங்காயத்தை தேனில் கலந்து சாப்பிடுவது நல்லது.

21. வெங்காயம் வயிற்றிலுள்ள சிறுகுடல் பாதையை சுத்தப்படுத்துகிறது. ஜீரணத்துக்கும் உதவுகிறது.

22. வெங்காயம் ரத்த அழுத்தத்தை குறைக்கும், இழந்த சக்தியை மீட்கும்.

23. தொடர்ந்து புகைப்பிடிப்பவர்கள் வெங்காயச் சாற்றை நாள் ஒன்றுக்கு அரை அவுன்ஸ் வீதம் மூன்றுவேளை சாப்பிட்டு வர நுரையீரல் சுத்தமாகும்.

24. வெங்காயச் சாற்றுடன், கடுகு எண்ணெய் கலந்து கீல் வாயு காரணமாக மூட்டுக்களில்ஏற்படும் வலி நேரத்தில் தடவிவர வலி குணமாகும்.

25. நறுக்கிய வெங்காயத்தை முகப்பரு உள்ள இடத்தில் தேய்த்தால் முகப்பரு நீங்கும்.

26. வெங்காயச் சாற்றோடு சிறிது உப்பு கலந்து அடிக்கடி சாப்பிட்டுவர, மாலைக்கண் நோய் சரியாகும்.

27. வெங்காயச் சாறையும், தேனையும் சம அளவு கலந்து கண்வலிக்கு ஒரு சொட்டுவிட கண்வலி, கண் தளர்ச்சி நீங்கும்.

28. ஜலதோஷ நேரத்தில் வெங் காயத்தை முகர்ந்தால் பலன் கிட்டும்.

29. வெங்காயத்தை அரைத்து தொண்டையில் பற்றுப்போட தொண்டை வலி குறையும்.

30. பாம்பு கடித்துவிட்டால் நிறைய வெங்காயத்தைத் தின்னவேண்டும். இதனால் விஷம் இறங்கும்.

31 ஆறு வெங்காயத்தை ஐநூறு மில்லி நீரிலிட்டு, கலக்கிப் பருக சிறுநீர் கடுப்பு, எரிச்சல் நீங்கும்.

32. வெங்காயம் சோடா உப்பு இரண்டையும் சேர்த்து அரைத்து நாய் கடித்த இடத்தில் தடவி, வெங்காய சாறை குடிக்க நாய் விஷம் இறங்கும். பின்பு மருத்துவரிடம் செல்ல வேண்டும்.

33. வெங்காயச் சாறோடு சர்க்கரை சேர்த்துக்குடிக்க மூலநோய் குணமாகும்.

34. காலரா பரவியுள்ள இடத்தில் பச்சை வெங்காயத்தை மென்றுதின்ன காலரா தாக்காது.

35. ஒரு பிடி சோற்றுடன் சிறிது உப்பு, நான்கு வெங்காயம் இவற்றை சேர்த்து அரைத்து, ஒரு வெற்றிலையில் வைத்து நகச்சுற்றுள்ள விரலில் காலை, மாலை வைத்துக்கட்ட நோய் குறையும்.

36. சிறிய வெங்காயத்தில் இன்சுலின் உள்ளது. நீரிழிவு நோயாளிகள் இதை அதிகமாகப் பயன்படுத்தலாம்.

37. தலையில் திட்டுத்திட்டாக முடி உதிர்ந்து வழுக்கை விழுந்திருந்தால் சிறு வெங்காயத்தை இரு துண்டாக நறுக்கி தேய்த்துவர முடிவளரும்.

38. காக்காய் வலிப்பு நோய் உள்ள வர்கள் தினசரி ஓர் அவுன்ஸ் வெங்காயச் சாறு சாப்பிட்டுவர வலிப்பு குறையும்.

39. வெங்காயத்தை தினமும் சாப்பிட்டுவர டி.பி.நோய் குறையும்.

40. வெங்காயச் சாற்றோடு சர்க்கரை சேர்த்து சாப்பிட வாதநோய் குறையும்.

41. தேள்கொட்டிய இடத்தில் வெங்காயத்தை நசுக்கித் தேய்க்க விஷம் இறங்கும்.

42. வெங்காயத்தை பசும் தயிருடன் சேர்த்து சாப்பிட்டுவர தாது பலமாகும்.

43. வெங்காயம் சாப்பிட தொண்டை கரகரப்பு நீங்கி குரல் வளமாகும்.

44. தினமும் மூன்று வெங்காயம் சாப்பிட்டுவர பெண்களுக்கு ஏற்படும் உதிரச் சிக்கல் நீங்கும்

45. வெங்காயத்தை துண்டு துண்டாக நறுக்கி விளக்கெண்ணெயில் வதக்கி சாப்பிட, மலச்சிக்கல் குறையும்.

46. வெங்காயத்தை அரைத்து முன் நெற்றி, பக்கவாட்டு நெற்றியில் பற்றுப் போட தலைவலி குறையும்.

47. மாரடைப்பு நோயாளிகள், ரத்தநாள கொழுப்பு உள்ளவர்கள் சின்ன வெங்காயம் சாப்பிடுவது நல்லது.

48. சின்ன வெங்காயச் சாறு கொழுப்பை உடனே கரைக்கும்.

49. வெங்காயத்தை ஒரு மண்டலம் தொடர்ந்து சாப்பிட்டுவர உடல்   குளிர்ச்சியும், மூளை பலமும் உண்டாகும்.

50. வெங்காயத்தை வதக்கிக் கொடுத்தால் பிள்ளைகள் விரும்பி சாப்பிடுவர். ஊட்டச்சத்து கிடைக்கும்.

ஆதாரம் :  தமிழ்மனம்

காற்று மாசு அடையாமல் இருக்க என்ன செய்ய வேண்டும் ?

காற்று மாசுபாடு


1) வளி மண்டலம்
2) காற்று மாசுபாடு
3) காற்று மாசுபாடுகளினால் ஏற்படும் விளைவுகள்
4)  மரங்கள் / தூய காற்றின் தோழன்
5)  உங்களின் பங்கு என்ன?

 

வளி மண்டலம்

நம் பூமியை சூழ்ந்துள்ள வளி மண்டலம், பல வாயுக்கலவை உடையதாகும், இதில் 79% நைட்ரஜனும் 20%, பிராணவாயுவும், 3% கரியமிலவாயுவும், சிறிதளவு பிற வாயுக்களும் உள்ளன.

காற்று மாசுபாடு

வாயுக்களின் இந்த சமச்சீர்நிலை மாறாமல் இருக்கும் வரையில் வளி மண்டலம் எந்தவித பாதிப்பும் அடையாது. தொழில் மயமாதல், நவீனமயமாதல் முதலியவற்றால் வளி மண்டலமானது பாதிப்படைகிறது, இவை காற்று மாசு ஏற்படுத்துவதற்கு வழிவகுக்கின்றன,

இந்தியா உட்பட பல நாடுகளில் காற்று மாசுக்கேடு ஒரு நிலையான பிரச்சனையாக உள்ளது. மனித உடல்நலம் உணவு, உற்பத்தி, சுற்றுச்சூழல் மற்றும் இயற்கை வளங்களையும் பாதிக்கின்றன,

நாம் சுவாசிக்கும் காற்று, தொழிற்சாலை மற்றும் வாகனங்கள் வெளியிடும் புகையினால் அசுத்தப்படுத்தப்படுகின்றது, தொழிற்சாலைகளிலிருந்து வெளிவரும் நைட்ரஜன் மற்றும் கந்தக ஆக்ஸைடுகள், பெட்ரோல் சுத்திகரிப்பு ஆலைகளிலிருந்தும் வாகனகளிலிருந்தும் வெளிவரும் வீரியமிக்க ஹைட்ரோ கார்பன்கள், வாகனங்களிலிருந்து வெளிவரும் கார்பன் மோனாக்ஸைடு, தொழிற்சாலைகளிலிருந்தும், உலோகம் பிரித்தெடுக்கும் ஆலைகளிலிருந்தும் வெளிவரும் உலோகத்துகள்கள், இரசாயனத் தொழிற்சாலைகளிலிருந்து வெளிவரும் கரிமச் சேர்மங்கள் முதலியவை காற்றை மாசுபடுத்துகின்றன.

காற்று மாசுபாடுகளினால் ஏற்படும் விளைவுகள்

கண் எரிச்சல், தலைவலி, தொண்டைக்கட்டு, காய்ச்சல் மற்றும் புற்றுநோய் போன்ற பல நோய்களை காற்று மாசுபாடு உண்டாக்குகிறது, தொழிற்சாலைகளும், வாகனங்களும் ஏற்படுத்தும் புகையினால் தாவரங்கள், நிலம், நீர், நினைவுச் சின்னங்கள் மற்றும் கட்டிடங்கள் முதலியவை பாதிக்கப்படுகின்றன.

அமில மழை 

தொழிற்சாலைகளிலிருந்து வெளியேறும் கந்தகம் மற்றும் நைட்ரஜன் ஆக்ஸைடு போன்ற வாயுக்களால் ஏற்படுகிற அமிலமழை, மண்ணின் அமிலத் தன்மையை அதிகப்படுத்துவது மட்டும் அல்லாமல் தாவரங்கள் இலைகளை உதிர்த்தல், குளம் மற்றும் ஆறுகளில் உள்ள நீர்வாழ் உயிரினங்கள் பாதிக்கப்படுதல் முதலிய பாதிப்புக்களும் காரணமாகிறது.

ஓசோன் படலம் 

வாயுமண்டலத்தின் ஸ்ரடோஸ்பியரிலுள்ள ஓசோன் படலம் சூரியனிலிருந்து வருகிற ஆபத்தான புற ஊதாக்கதிர்களை தடைசெய்கிறது. அதிகவேக விமானங்கள் (சூப்பர் சானிக்) வெளியிடும் அதிகப்படியான நைட்ரஜன் ஆக்ஸைடுகளும், குளிர்சாதனப் பெட்டி, தீயணைப்பான் போன்றவற்றிலிருந்து வெளிவரும் க்ளோரோப்ஃபளோரோ கார்பன்களும் ஓசோன் படலத்தை சிதைக்கிறது. இதன் விளைவாக மனிதர்களுக்கும் விலங்குகளுக்கும் தோல் புற்றுநோய் ஏற்படுகிறது.

வாகனங்கள் - காற்று மாசுகேட்டின் முக்கிய காரணிகள் 

மனிதனின் கண்டுபிடிப்பான வாகனங்கள் நம்மிடம் உள்ள எண்ணெய் சேமிப்பை குறைத்து வாகனங்களிலிருந்து வெளிவரும் புகை (கார்பன் மோனா ஆக்ஸைடு) (நைட்ரஜன்) ஆக்ஸைட்டு மற்றும் பிற வாயுகள் காற்றை மாசுப்படுத்திகிறது. இவை, சூரிய கதிர்களுடன் இணைந்து ஒளிவேதி நச்சுப்புகை படலத்தை ஏற்படுத்துகிறது, இது நகரங்களில் பெரிதும் பாதிக்கின்றன.

தொழிற்சாலை மற்றும் வாகனங்களில் இருந்து வெளியேறும் வாயுக்களோ வளிமண்டலத்தில் அமிலத்தன்மையை ஏற்படுத்துக்கின்றது. இது அமில மழையாக உற்பத்தியாகிறது. இதனால் நிலத்தடி நீர் மாசுடைகின்றது.

ஒலிச் சீர்கேடு 

ஒலிச்சீர்கேடு நகரங்களில் பாதிப்புக்களை அதிகபடுத்துகிறது. வாகனங்களின் சத்தம், ஒலிப்பெருக்கி ஏற்படுத்தும் இரைச்சல், பொருட்களை விற்போர் கூச்சல், இயந்திரம் ஏற்படுத்தும் உராய்வு சத்தம் போன்றவை மனகவலை, மன அழுத்தம், தலைவலி மற்றும் காது கோளான்மையை ஏற்படுத்துகிறது.

மரங்கள் / தூய காற்றின் தோழன்

மரங்கள் கார்பன்டை ஆக்ஸைடுகளை ஆக்சிஜனாக மாற்றுகிறது. நகர வளர்ச்சிக்காக மரங்களை வெட்டுவதால் நச்சு வாயுக்கள் வளிமண்டலத்தில் அதிகரிக்கிறது, இதனால் காற்று மாசு ஏற்படுத்துகிறது, இதில் இரைச்சலும் அடங்கும். மரங்கள் இரைச்சலை குறைக்கின்றன.

உங்களின் பங்கு என்ன?

வீடுகளில் 

சமையலின் போது புகையினை குறைக்க காற்றோட்டமான இடத்தில் சுத்தமான எரியான்களையும், மேம்படுத்தப்பட்ட அடுப்புகளையும், சாண எரிவாயுக்கலன்களையும் பயன்படுத்தலாம். வீட்டிற்க்கு பின்புறம் குப்பைகளை எரிப்பதை தவிர்க்கவும். புகையிலை பயன்பாட்டை நிறுத்தவும். இது நம் உடல் நலத்தை கெடுக்கும்.  புகையிலையை சுவாசிப்போர்களின் நலத்தையும் கெடுக்கும்.

வாகனங்களில் 

புகை வெளியேற்றத்தை அவ்வப்போது பரிசோதித்து தேவைப்படுமாயின் சீர் செய்யலாம். வாகனத்தை நல்முறையில் பராமரித்தல் சீர்கேட்டைத் தவிர்க்கும்.

கரியமில்லா பெட்ரோலை நடைமுறைப்படுத்தவும். வாகன உற்பத்தியின்போது, கரியமில்லா பெட்ரோலுக்கென எஞ்சின் பாகங்களை தக்கபடி மாற்றியமைக்கவும் அரசு ஆவன செய்ய துணைபுரியலாம்.

கூடுமானவரையில் பொது வாகனங்களில் பயணித்தல் எரிபொருள் தட்டுப்பாட்டையும் தூய்மைக் கேட்டினையும், சாலை நெரிசலையும் பெருமளவு மட்டுப்படுத்தும்.

தொழிற்சாலைகளில்

தொழிற்சாலைகளில் வடிப்பான்களையும், சுத்திகரிப்பு கலன்களையும் கொண்டிருக்க வேண்டும். அவ்வாறில்லாத போது எதிர்ப்புக்குழுக்கள் ஏற்படுத்தி அவற்றை பொருத்த ஆவன செய்ய வேண்டும்.

அரசாங்கம் கேடு விளைவிக்கும் தொழிற்சாலைகளின் மேல் தீவிர நடவடிக்கை எடுக்க வேண்டும். தூய்மைக் கேட்டினை ஏற்படுத்தும் நிறுவனங்களின் மீதும் நடவடிக்கை எடுக்க காற்று பாதுகாப்பு மற்றும் மாசு கட்டுப்பாடு சட்டத்தில் வழிவகை செய்யப்பட்டுள்ளது.

கல்வியே கடைசித் தீர்வு

பள்ளிகளிலும், கல்லூரிகளிலும் புகைபிடித்தலின் தீமை பற்றியும், தூய்மைக்கேட்டினைத் தவிர்க்கும் மாற்று வழி முறைகள் பற்றியும் முகாம் நடத்தலாம் உள்ளூர் தூய்மைக் கேட்டிற்கு எதிராக அவ்வட்டார மக்களைக் கொண்டு போராடலாம்.

அந்தந்த ஊர்ப் பிரச்சனைகள் பற்றி அவ்வப்போது பத்திரிக்கைகளுக்கும் உள்ளூர் சட்டமன்ற / பாராளுமன்ற உறுப்பினர்களுக்கும் தகவல் கொடுக்கலாம். ஒவ்வொருவரும் தத்தம் சுற்றுப்புறத்தை தூய்மையாக வைத்துக் கொண்டால் சுற்றுச்சூழல் தூய்மையுடனிருக்கும் என்பதில் ஐயமில்லை.


Wednesday, November 13, 2019

தொலைந்த மொபைலை ஒரே நிமிடத்தில் நாமே கண்டுபிடிக்கலாம்

தொலைந்த மொபைலை ஒரே நிமிடத்தில் நாமே கண்டுபிடிக்கலாம்.

அனைத்தையும் லாக் கூட செய்யலாம்.

images for mobile phones with actor க்கான பட முடிவு
செல்போன் தவற விட்டால் பதறாமல் இருந்த இடத்திலிருந்தே கண்டுபிடித்து விடலாம்.

அது மட்டும் இல்லாமல், நம்முடைய தனி மனித  ரகசியத்தை  பற்றி கவலை கொண்டால், அல்லது மிக முக்கிய செய்திகள் மற்றும் பைல்ஸ் யாரேனும் திருட முடியும் என்று பயந்தாலோ இனி அந்த கவலையை விட்டு விடுங்கள்.....

அந்த போனில் உள்ள முக்கிய தகவல்களை லாக் செய்ய முடியும்.

தவற விட்ட, திருடப் பட்ட செல்போனில் உள்ள முக்கிய தகவல்களை அழிக்க முடியும்.

ஆச்சரியமாக இருக்கிறதா !

இது உண்மை !

இந்த அத்தனை வசதிகளையும் எப்படி பயன்படுத்துவது என்று பார்ப்போம்.

find my device

find my device மூலம்இதை எளிதான செய்ய முடியும்.

முதலில் கூகுள் சர்ச்சில் android.com/find என டைப் செய்யுங்கள்..


பிறகு உங்கள் கூகுள் அக்கவுண்டை   log in செய்ய வேண்டும்.

உங்களின் email and password கொடுத்த பின்பு லாக் இன் ஆகும்.

அப்போது ஸ்க்ரீனின் இடது புறம் நாம் தவறவிட்ட செல்போன் மாடல் எண் மற்றும் அதற்கு கீழே play sound, lock , erase என்ற 3 தகவல்கள் இருக்கும்.

ஸ்கிரீன் வலது புறம் தற்போது அந்த செல்போன் எந்த இடத்தில் உபயோகத்தில் உள்ளது என்பது map மூலமாக தெரியவரும்.

play sound கிளிக் செல்தால் செல்போன் 5 நிமிடம் ஒலிக்கும்.

lock ஆப்சனை கிளிக் செல்தால் செல்போன் லாக் ஆகி விடும்.

erase ஆப்சனை கிளிக் செல்தால் செல்போனில் உள்ள தகவல் அனைத்தும் அழிந்து விடும்.

இந்த அற்புதமான செய்தியை நாம் ஒவ்வொரு வரும் தெரிந்து வைத்து கொண்டால், என்றோ ஒரு நாள் நமக்கே பயன்படும்.

அதுமட்டும் இல்லாமல் மிக எளிதில் எந்த இடத்தில் அந்த மொபைல் இயங்கி கொண்டிருகிறது என்பதையும் தெரிந்துகொள்ள முடியும்.

By K.VisvaKaviarasan-Police Department, Chennai.

Friday, November 1, 2019

கீரீன் டீ அருந்துவதனால் உண்டாகும் நன்மைகளும் தீமைகளும் !



கிரீன் டீ ஆரோக்கியமான பானங்களில் ஒன்றாகும். உடல் ஆரோக்கியத்தை மேம்படுத்தக் கூடியது. உடல் எடை இழப்புக்கு பெரும்பாலான மக்கள் கிரீன் டீயை குடிக்கிறார்கள். அவ்வகையில் அண்மைக் காலங்களில் கிரீன் டீக்கு மவுசு அதிகம் ஏற்பட்டுள்ளது. மேலும் கிரீன் டீயில் ஆன்டிஆக்ஸிடன்ட்கள் நிரம்பியுள்ளது, இது உங்கள் உடலில் சக்திவாய்ந்த தாக்கத்தை ஏற்படுத்துகிறது. இது உடல் பலவீனத்தை எதிர்த்துப் போராடவும் உதவும். 

கிரீன் டீயின் உள்ள சில கூறுகள் மூளையின் செயல்பாட்டை மேம்படுத்துகின்றன. இந்த டீயை தொடர்ந்து குடித்து வந்தால் சிலவகைப் புற்றுநோய்களின் அபாயத்தையும் குறைக்கும் என்று பல்வேறு ஆய்வுகள் தெரிவிக்கின்றன. கிரீன் டீயின் ஆரோக்கிய நன்மைகள் இப்படி அனேகம் உள்ளன. இது இதய நோய்கள் வருவதற்குரிய அபாயங்களைத் தடுக்கவும் உதவுகிறது. உடல் எடை இழப்பு என்பது கிரீன் டீ குடிப்பது மிகவும் பிரபலமானது.  கிரீன் டீ வளர்சிதை மாற்ற விகிதத்தை மேம்படுத்தி, உடல் கொழுப்பைக் குறைக்க உதவுகிறது. உடல் எடையை குறைக்க, பெரும்பாலான மக்கள் தேவையானதை விட கிரீன் டீயை அதிகம் உட்கொள்கிறார்கள். ஆனால் அதிக கப் கிரீன் டீ குடிப்பது ஆரோக்கியமானதா?

கிரீன் டீயின் பக்க விளைவுகள்

கிரீன் டீ ஆரோக்கியத்துக்கு நல்லதுதான், ஆனால் அதிக அளவில் அதை உட்கொண்டால், சில உடல் பிரச்னைகளுக்கு வழிவகுக்கும். நீண்ட காலத்திற்கு க்ரீன் டீயை அதிகமாக உட்கொண்டால் சில பக்க விளைவுகள் உள்ளன. அவை
1. ஆசிட் ரிஃப்ளக்ஸ்
அதிக கிரீன் டீ குடிப்பது அதிலும் வெறும் வயிற்றில் குடிப்பது உங்கள் வயிற்றை எதிர்மறையாக பாதிக்கும். இது நெஞ்செரிச்சல் மற்றும் வயிறு தொடர்பான பிற பிரச்னைகளுக்கு வழிவகுக்கும். இது போன்ற ஏதேனும் சிக்கல்களை நீங்கள் எதிர்கொண்டால், வெறும் வயிற்றில் கிரீன் டீ குடிப்பதைத் தவிர்க்க வேண்டும். கிரீன் டீயை அதிகமாக உட்கொள்வது குறிப்பாக கர்ப்பிணிப் பெண்களுக்கு வயிற்றுப் பிரச்னைகளை ஏற்படுத்தும்

2. இரும்பு உறிஞ்சுதலைக் குறைக்கிறது

கிரீன் டீயின் மற்றொரு பக்க விளைவு என்னவென்றால், இதை அதிக அளவில் குடிப்பதால் உடலில் இரும்புச் சத்து உறிஞ்சப்படுவதை குறைத்துவிடும். இரும்பு உடலுக்கு மிகவும் அத்யாவசியம். கிரீன் டீயில் இருக்கும் கேடசின்கள் எனும் வேதிப்பொருள் உணவில் இருந்து இரும்புச் சத்து உறிஞ்சுதலுக்கு பங்களிக்கின்றன. எனவே, அதிகப்படியான கிரீன் டீயை கண்டிப்பாக தவிர்த்துவிட வேண்டும்.

3. அதிகப்படியான காஃபின்

அதிகப்படியான காஃபின் உட்கொள்வது உங்கள் ஆரோக்கியத்திற்கு பல வழிகளில் தீங்கு விளைவிக்கும். கிரீன் டீ குடிப்பதால் உங்கள் காஃபின் அளவு அதிகரிக்கும். இது உங்கள் தூக்க முறையைத் தொந்தரவு செய்யலாம் கவலை அல்லது வயிற்று வலியைக் கூட ஏற்படுத்தும். நாள் முழுவதும் காஃபின் உட்கொள்வதைக் கட்டுப்படுத்த நீங்கள் பழக வேண்டும். 

4. தலைவலி ஏற்படலாம்

அதிக கிரீன் டீ குடிப்பதும் தலைவலியும் ஒன்றுக்கு ஒன்றுடன் தொடர்புடையது. அதிகப்படியான காஃபின் உட்கொள்வதால் தலைவலி மற்றும் தலைச்சுற்றல் மற்றும் வாந்தி போன்ற பிற பிரச்னைகளுக்கு வழிவகுக்கிறது.

ஒரு நாளில் எவ்வளவு கிரீன் டீ குடிக்க வேண்டும்?

க்ரீன் டீயை அதிக அளவு குடிப்பதால் இப்படி பல பக்க விளைவுகள் உள்ளதால், நீங்கள் கிரீன் டீயை குறிப்பிட்ட அளவில் மட்டுமே அருந்த வேண்டும். நீங்கள் ஒரு நாளில் 2- 3 கப் வரை கிரீன் டீ குடிக்கலாம். நிச்சயம் ஒரு நாளில் 3 கப் தாண்டக் கூடாது.

Thanks to Dinamani.com

ஊஞ்சல் ஆடுவது எதற்காக தெரியுமா…?

ஊஞ்சல் ஆடுவது எதற்காக தெரியுமா…?    முன்பெல்லாம் ஊருக்கு வெளியே ஆலமரத்தில் ஊஞ்சல் கட்டி பெண்கள் ஆனந்தமாக ஆடினார்கள். பின்பு படிப்படியாய் அது...